საქართველოს პრემიერ-მინისტრმა ირაკლი კობახიძემ გამოსცა ბრძანება, რომლითაც ცნობილი გახდა, რომ ის სამთავრობო დელეგაციასთან ერთად უნგრეთში მიემგზავრება. მთავრობის ადმინისტრაციაში რადიო თავისუფლებას უთხრეს, რომ ეს არ არის ოფიციალური ვიზიტი და პრემიერ-მინისტრი უნგრეთში კონფერენციაზე დასასწრებად (24-25 აპრილს) ჩავა. კობახიძესთან ერთად დელეგაციაშია საგარეო საქმეთა მინისტრი ილია დარჩიაშვილი.
მთავრობის ადმინისტრაციაში თავდაპირველად არ ასახელებდნენ ღონისძიებას, რომელშიც ირაკლი კობახიძე მიიღებს მონაწილეობას. მოგვიანებით გვითხრეს, რომ ის მონაწილეობას მიიღეს „კონსერვატიული პოლიტიკური მოქმედების კონფერენციაში“ (CPAC-ში).
მოგვიანებით, CPAC-ის ვებსაიტზე გამოქვეყნდა ღონისძიებაში მონაწილე სპიკერთა სია, რომელთა შორის არის ირაკლი კობახიძე.
ირაკლი კობახიძე უნგრეთის დედაქალაქ ბუდაპეშტში ვიზიტით ბოლოს 2023 წლის დეკემბერში იმყოფებოდა, ჯერ კიდევ საპარლამენტო უმრავლესობის ლიდერის რანგში.
2023 წლის მაისში, იმდროინდელმა პრემიერ-მინისტრმა ირაკლი ღარიბაშვილმა უნგრეთში მონაწილეობა მიიღო, სწორედ, ულტრაკონსერვატორების ამ კონფერენციაში (CPAC-ში) დევიზით: „ლიბერალების კოშმარი: ეროვნული ძალების საერთაშორისო შერწყმა“.
კონფერენციის ბევრი მონაწილე ცნობილია რუსეთ-უკრაინის ომში ღიად პრორუსული, იზოლაციონისტური პოზიციით და თანაც ქსენოფობიური და ჰომოფობიური გზავნილებით.
ღარიბაშვილის ეს ნაბიჯი დაგმო „ევროპელი სოციალისტების პარტიამ“ (PES-მა), რომლის დამკვირვებელი წევრიც იყო „ქართული ოცნება“. PES-მა განაცხადა, რომ „ოცნებასთან“ თანამშრომლობას გადახედავდა, თუმცა „ოცნებამ“ დაასწრო და თქვა, რომ PES-ს ტოვებდა…
უნგრეთის პრემიერ-მინისტრი ვიქტორ ორბანი საქართველოში გასული წლის ოქტომბერში ვიზიტით იმყოფებოდა.
ორბანი, - რომელიც 2012 წლის არჩევნებამდე 4 დღით ადრე, წინა მმართველი გუნდის აქციაზე მიხეილ სააკაშვილის მხარდასაჭერად სიტყვით გამოვიდა და მოსახლეობა გააფრთხილა, წარსულში ნუ დაბრუნდებითო, - ახლა „ქართული ოცნების“ მოკავშირედ იქცა ევროკავშირში.
საქართველომ და უნგრეთმა 2022 წლის 27 ოქტომბერს, პრემიერ-მინისტრ ღარიბაშვილის უნგრეთში ვიზიტისას, მოაწერეს ხელი სტრატეგიული პარტნიორობის შესახებ დეკლარაციას.