პრემიერ-მინისტრმა ირაკლი კობახიძემ, აშშ-ის სახელმწიფო დეპარტამენტის მაღალჩინოსანთან საუბრის შემდეგ, ახლა ევროპული საბჭოს პრეზიდენტ შარლ მიშელთან სატელეფონო საუბრისას ახსენა „2020-2023 წლებში საქართველოში რევოლუციის მოწყობის ორი მცდელობა“.
კობახიძის განცხადებით, იგი შარლ მიშელს „უცხოური გავლენის გამჭვირვალობის შესახებ“ და „ოჯახურ ღირებულებათა და არასრულწლოვანთა დაცვის შესახებ“ კანონპროექტებზე ესაუბრა.
„გამოვთქვი სინანული იმის გამო, რომ არაერთი შეთავაზების მიუხედავად, პარტნიორები თავს არიდებენ საგნობრივ დისკუსიას გამჭვირვალობის შესახებ კანონპროექტის თაობაზე“, - დაწერა კობახიძემ.
გარდა ამისა, კობახიძის თქმით, მან მიშელს უთხრა, რომ „დღემდე ვერ მოვისმინეთ ვერცერთი არგუმენტი აღნიშნული კანონპროექტის წინააღმდეგ, რომლის ერთადერთი მიზანი ქართული საზოგადოების მიმართ შესაბამისი ორგანიზაციების გამჭვირვალობისა და ანგარიშვალდებულების უზრუნველყოფაა“.
მას შემდეგ, რაც „ქართულმა ოცნებამ“ ხელახლა წარადგინა პარლამენტში „უცხოეთის აგენტების“ კანონი, ევროკავშირმა აშშ-მა განაცხადეს, რომ მისი მიღება საქართველოს ხელს შეუშლის ევროინტეგრაციაში. პარლამენტში „ოცნების“ ლიდერები ოპონენტებს არ აძლევდნენ საშუალებას, კანონპროექტის კონტრარგუმენტები დაესახელებინათ და მიკროფონს უთიშავდნენ.
„ევროპული საბჭოს პრეზიდენტის ყურადღება გავამახვილე იმ გარემოებაზეც, რომ უცხოეთიდან დაფინანსებული ორგანიზაციები 2020-2023 წლებში საქართველოში რევოლუციის მოწყობის ორ მცდელობაში იყვნენ აქტიურად ჩართული“, - დაწერა პრემიერ-მინისტრმა.
წინა საღამოს კობახიძე ტელეფონით ესაუბრა აშშ-ის სახელმწიფო დეპარტამენტის მრჩეველს საგარეო პოლიტიკის საკითხებში, დერეკ შოლეს და სახელმწიფო დეპარტამენტი „რევოლუციური მცდელობის“ მხარდაჭერაში დაადანაშაულა.
კობახიძის თქმით, შარლ მიშელს ასევე უთხრა, რომ „გამჭვირვალობის შესახებ კანონის მიღება არის აუცილებელი პირობა ევროკავშირის მთავარი რეკომენდაციის შესრულებისთვის - ე.წ. დეპოლარიზაციის უზრუნველყოფისთვის“.
მანამდე ევროპული საბჭოს პრეზიდენტმა შარლ მიშელმა სოციალურ ქსელ X-ზე დაწერა, რომ საქართველოს პრემიერ-მინისტრ ირაკლი კობახიძესთან სატელეფონო საუბარში ქვეყანაში მიმდინარე მოვლენები განიხილა.
„პრემიერ-მინისტრ ირაკლი კობახიძესთან სატელეფონო საუბარში განვიხილეთ საქართველოში ბოლო დროს განვითარებული მოვლენები. კიდევ ერთხელ გავიმეორე ევროკავშირის სრული მხარდაჭერა საქართველოს ყველა მოქალაქის მიმართ, ვინც პირველ ადგილზე აყენებს თავისი ქვეყნის ევროპულ მომავალს“, - დაწერა შარლ მიშელმა X-ზე 3 მაისს.
„ცოცხალი დებატები არის [დემოკრატიული საზოგადოების] ქვაკუთხედი და ამჟამად ნამდვილი დიალოგია საჭირო. საქართველოს მომავალი ევროკავშირშია. არ გაუშვათ ხელიდან ეს ისტორიული შანსი“, - აცხადებს შარლ მიშელი.
1 მაისს საქართველოს პარლამენტმა „აგენტების კანონი“ მეორე მოსმენით მიიღო.
„უცხოური გავლენის გამჭვირვალობის შესახებ“ კანონის ძალაში შესვლის შემთხვევაში, მედიასაშუალებებსა და არასამთავრობო ორგანიზაციებს, რომლებიც დაფინანსების 20%-ზე მეტს უცხოელი დონორებისგან იღებენ, დაავალდებულებენ, დარეგისტრირდნენ, როგორც „უცხოური ძალის ინტერესების გამტარებელი ორგანიზაცია“.
„აგენტების კანონის“ წინააღმდეგ საპროტესტო აქციები სახელწოდებით: „კი ევროპას! არა რუსულ კანონს“ თბილისში მესამე კვირაა, უწყვეტად მიმდინარეობს.
ფორუმი